Hum darya darya roye thay

Hum khawabon k beopari thay
par is mein hua nuksan bohat
kuch bakht mein dheron kalak thi
kuch ab k ghazab ka kaal parha
hum raakh liye hain jholi mein
... or sar pe hai sahokaar khara

jab dharti sehra sehra thi
hum darya darya roye thay
jab hath ki rekhaein chup thin
or sur sangeet mein soye thay
tab humne jeevan kheti mein
kuch khawab anokhay boye thay

phir apni ghayal aankhon se
khush ho k laho chirkaya tha
maati mein maas ki khad bhari
or nas nas ko zakhmaya tha
or bhool gaye pichli rut mein
kya khoya tha kya paya tha

jab fasal kati to kya dekha
kuch dard k tootay gajray thay
kuch zakhmi khawab thay kanto par
kuch khaaksatar se kajray thay
or door uffak k saghar mein
kuch doltay dobtay bajray thay

ab ghat na ghar dehleez na dar
ab paas raha hai kya baba
bas tan ki gathri baki hai
jaa tu bhi ye le jaa baba
hum basti chore jate hain
tu apna karz chuka baba